2011, ഫെബ്രുവരി 8, ചൊവ്വാഴ്ച

ശ്രീ പത്മനാഭസ്വാമിയുടെ ദ്വാരപാലകര്‍

ഒരു പക്ഷെ പല വിനോദസഞ്ചാരികള്‍ക്കും ഭാഷയറിയാത്ത ഭക്തര്‍ക്കും ഇത് സംഭവിച്ചിട്ടുണ്ടാകാം.പക്ഷെ ഞാന്‍ ആദ്യമായാണ് ഇങ്ങിനെയൊരു സംഭവം അറിയുന്നത്.

മൂന്ന് തലമുറകള്‍ക്ക് മുന്‍പ് സൌത്ത് ആഫ്രിക്കയിലേയ്ക്ക് കുടിയേറിയ പൂര്‍ണ്ണഹൈന്ദവ വിശ്വാസികളായവരുടെ പിന്‍‌തലമുറക്കാര്‍ക്ക് ക്ഷേത്രപ്രവേശനത്തിന് വിലക്ക്.  എന്റെ സുഹൃത്ത് കഴിഞ്ഞയാഴ്ച നടത്തിയ കേരളം സന്ദര്‍ശനത്തിലാണ് ഈ കല്ലുകടി.
കൃഷ്ണഭക്തനാണദ്ദേഹം. വെറും കൃഷ്ണഭക്തനല്ല, ഭഗവദ്‌ഗീത പാരായണം ചെയ്യുകയും ദിവസം രണ്ടുനേരം ഭഗവദ്‌സ്ത്രോത്രങ്ങള്‍ ധ്യാനിയ്ക്കുകയും ചെയ്യുന്ന പരിപൂര്‍ണ്ണ വിശ്വാസി. അദ്ദേഹത്തോട് കേരളത്തെപ്പറ്റിയും ക്ഷേത്രങ്ങളെക്കുറിച്ചും പറഞ്ഞപ്പോള്‍ തിരക്കിനിടയിലും ആയിരം തലയുള്ള അനന്തന്റെ മടിയില്‍ തലവച്ച് ഭൂമീദേവിയ്ക്കും ലക്ഷ്മീദേവിയ്ക്കും സാന്നിധ്യത്തില്‍ ശയിയ്ക്കുന്ന സാക്ഷാല്‍ പത്മനാഭനെ കാണാന്‍ മറക്കരുതെന്ന് പറഞ്ഞിരുന്നു ഞാന്‍. അതനുസരിച്ച് കുടുംബസമേതം ചെന്ന അദ്ദേഹത്തിന് കിട്ടിയത് അപമാനം.

ഭാഷയറിയാത്തതുകൊണ്ട് ക്ലോക്ക് റൂമിലുള്ള അഡ്മിനിസ്ടേറ്റീവ് സ്റ്റാഫിനോട് സഹായം അഭ്യര്‍ത്ഥിച്ച അദ്ദേഹം അറിയാവുന്ന തമിഴിലും ഇംഗ്ലീഷിലുമായി തങ്ങള്‍ ഹിന്ദുക്കളാണെന്നും മൂന്ന് തലമുറകള്‍ക്ക് മുന്‍പ് സൌത്ത് ആഫ്രിയ്ക്കയിലേയ്ക്ക് കുടിയേറിയതാണെന്നും പറഞ്ഞപ്പോള്‍ ക്ഷേത്രപ്രവേശനം സാധ്യമല്ല എന്ന് തീര്‍ത്ത് പറഞ്ഞ് മടക്കിയയയ്ക്കുകയായിരുന്നു.

തൂണിലും തുരുമ്പിലും താനുണ്ടെന്ന് തെളിയിയ്ക്കാന്‍ നരസിംഹനായി അവതരിച്ച സാക്ഷാല്‍ ഭഗവാനെയാണ് പത്മനാഭദാസന്റെ കൂലിപട്ടാളം അടച്ച്പൂട്ടി ഭക്തരില്‍ നിന്ന് അകറ്റിനിര്‍ത്തുന്നത്.

എന്റെ പിഴ, കേരളം മനോഹരമാണെന്നും, ജനങ്ങള്‍ സംസ്കാരസ്മ്പന്നരും സ്ത്കാരപ്രിയരാണെന്നും പറഞ്ഞ് അവരെ എന്റെ സ്വന്തം നാട്ടിലേക്കയച്ച് നാണം കെടുത്തിയത് എന്റെ തെറ്റ്.
ആചാരങ്ങളും അനുഷ്ഠാനങ്ങളും ഭക്തരെ ആകര്‍ഷിയ്ക്കുകയാണ് വേണ്ടത്, അവരെ അകറ്റുകയല്ല.

2010, ഓഗസ്റ്റ് 27, വെള്ളിയാഴ്‌ച

നഗരത്തിൽ പുലികൾ

ഒളിഞ്ഞും തെളിഞ്ഞും നിന്ന മഴയെ തൃണവൽഗണിച്ചുകൊണ്ട് പതിനായിരങ്ങൾ നഗരത്തിലിറങ്ങിയ പുലികളെ കാണാനെത്തി. മഴ വീണ്‌ നനഞ്ഞ റോഡിൽ പുലികൾ നിറഞ്ഞാടി. കുട്ടീപുലികളെ ആരവത്തോടെയാണ്‌ ജനം സ്വീകരിച്ചത്. 4 മണിയ്ക്ക് തുടങ്ങുമെന്ന് കരുതിയിരുന്ന പുലിക്കളി 5 മണി കഴിഞ്ഞു തുടങ്ങിയപ്പോൾ.

പുലിമടയിൽ നിന്ന്

നിങ്ങളിത് കാണുമ്പോഴേയ്ക്കും നഗരം പുലികളിൽ നിന്ന് വിമോചിതയായിട്ടുണ്ടാകും. അവസാനത്തെ പുലിയും ഏതെങ്കിലും മാളങ്ങളിൽ കയറി മറഞ്ഞിട്ടൂണ്ടാകും.
മുഖമില്ലാത്ത പുലികളും മുഖമുണ്ടെന്ന് മറ്റാരും ഓർക്കാത്ത അണിയറ പ്രവർത്തകരും പുലിക്കളിയുടെ ക്ഷീണത്തിൽ മയങ്ങിയിട്ടുണ്ടാകും ഇപ്പോൾ.
രാവിലെ 10 മണി മുതൽ ചായം തേച്ച് തുടങ്ങിയതാവും ചില പുലികൾക്ക്. പുലികളെ ക്കണ്ട് ആഹ്ളാദിയ്ക്കുന്നവർ അതിനു പുറകിൽ കഠിനാദ്ധ്വാനം ചെയ്ത ചിത്രകാരന്മാരെ ഓർക്കാറില്ല.
ഈ ചിത്രങ്ങൾ അധികം ശ്രദ്ധിയ്ക്കപ്പെടാതെ പോകുന്ന ആ കലാകാരന്മാർക്ക് സമർപ്പിയ്ക്കുന്നു.

ഇന്ന് ഇറങ്ങുമ്പോൾ തന്നെ മഴക്കോൾ കണ്ടിരുന്നു. എങ്കിലും നേരെ റൌണ്ടിലേയ്ക്ക്. പിന്നെ അവിടെ നിന്ന് ചക്കാമുക്കിലേയ്ക്ക്. അവിടെ തകർപ്പൻ ആഘോഷം. അവിടെ നിന്ന് കൈനാട്ടൂകരയിലേക്ക്. അവിടേ നിന്ന് പൂങ്കുന്നത്തേയ്ക്ക്. അപ്പോഴേയ്ക്കും പുലിയിറങ്ങാൻ സമയമായി, ഇനി സ്വരാജ് റൌണ്ടിൽ.

പുലിമടയിൽ എന്ത് സംഭവിയ്ക്കുന്നു എന്ന് നോക്കാം.



ശരീരത്തിലെ രോമം മുഴുവൻ വടിച്ച് കളഞ്ഞ് റെഡിയായി നിൽക്കുന്ന പുലിയുടെ മേൽ ചായം തേച്ച് തുടങ്ങുന്നു.

ഈ പുലിദേഹം ഒരു സ്പെഷ്യൽ പുലിയാണ്‌ ,നല്ല സൂപ്പറ് വയറ്
                                                                      ഒരു കുഞ്ഞിപ്പുലി
ഇത് ചാത്തുണ്ണീയേട്ടൻ പുലി. സാധാരണ പുലികളെപ്പോലെയല്ല ചാത്തുണ്ണിപ്പുലി. മെലിഞ്ഞ്, വയറൊന്നും തീരെയില്ല; അതാണ്‌ ശരിയായ പുലിയെന്ന് പുള്ളീയും. ഇത് 53ം വർഷമാണ്‌ പുലിവേഷം കെട്ടൂന്നത്. ചില പുലികൾ അല്പ്പം സേവിച്ചതിന്‌ സേഷമാണ്‌ വേഷം കെട്ടൂന്നത്. എന്നാൽ ചാത്തുണ്ണിയേട്ടൻ പുലി 41 ദിവസത്തെ വ്രതത്തിന്‌ ശേഷവും.അദ്ദാണ്‌ ചാത്തുണ്ണിപ്പുലി.
ചേട്ടാ, ഒരു കോപ്പി തരണട്ടാ, കല്യാണബ്യൂറോല്‌ കൊടുക്കാനാ..
ബീഫടിയ്ക്കുന്ന പുലികൾ
ഒണങ്ങാൻ നിറുത്തിയിരിയ്ക്കുന്ന പുലികൾ
സ്മോക്കിങ്ങ് പുലി
ഞങ്ങളേം കൂടി ഫേമസാക്ക് ചേട്ടാ..
വെജിറ്റേറിയൻ പുലി
ഇങ്ങ്ട് നോക്ക്യേ, ദേ ഇങ്ങിന്യാ വയറ് കുലുക്കാ...
കടിച്ച് കീറാൻ വരുന്ന പുലി സംഘം

2010, മാർച്ച് 19, വെള്ളിയാഴ്‌ച

കിടുവയെപ്പിടിയ്ക്കുന്ന കടുവകള്‍

പലതവണ പത്രങ്ങളിലും ബ്ലോഗുകളിലും നൈജീരിയന്‍ തട്ടിപ്പുകാരെ സംബന്ധിച്ച് വാര്‍ത്തകള്‍ വന്നതാണ്. ഇന്ന് മനോരമയില്‍ കണ്ട വാര്‍ത്തയാണ് ചില കാര്യങ്ങള്‍ ഓര്‍മ്മിപ്പിച്ചത്.
നിങ്ങളില്‍ പലര്‍ക്കും താഴെക്കാണുന്ന പോലുള്ള മെയിലുകള്‍ ലഭിച്ചിട്ടുണ്ടാകും. പലരും അത് അപ്പോള്‍ തന്നെ ദിലീറ്റ് ചെയ്യുകയോ സ്പാം ഫോള്‍ഡറിലേയ്ക്ക് മാറ്റുകയോ ചെയ്തിട്ടുണ്ടാകും.
വേറെ ചിലര്‍ അതില്‍ കാണുന്ന പോലെ വന്‍‌തുകകള്‍ സ്വന്തമാക്കാന്‍ കയ്യിലിരിയ്ക്കുന്ന കാശ് മുഴുവന്‍ പല തട്ടിപ്പുകാര്‍ക്കും അയച്ച് കൊടുക്കുകയും ചെയ്യും. അങ്ങിനെ ഒരു ആയുര്‍വേദഡോക്റ്റര്‍ക്ക് പറ്റിയ അക്കിടിയെത്തുടര്‍ന്നുള്ള അന്വേഷണമാണ് രണ്ട് നൈജീരിയക്കാരെ പിടിയ്ക്കാന്‍ സഹായമായത്.

എന്നാല്‍ ഇനിയും ഒരു കൂട്ടരുണ്ട്. അവരെക്കുറിച്ചാണ് ഈ പോസ്റ്റ്.

The Palace of King of Ogoni Kingdom,
Ogoni Oil producing community,
Rivers State Nigeria.

Dear Sir,

I am Princess blessing , daughter of HRH King Solomon Abonime, the king of Ogoni Kingdom. I am 25 years old and a graduate of Mass Communication.

My father was the king of Ogoni Kingdom the highest oil producing area in Nigeria. He was in charge of reviving royalties from the multi-national oil companies and government on behalf of the oil producing communities in Nigeria. After the hanging of the Ogoni Nine(9) including Ken Saro Wiwa by the late dictator General Sani Abacha, my father suffered stroke and died in August27th 2004 last year. But before his death, he called me and told me he has Twenty Three Million Five Hundred and Sixty Thousand Dollars (USD23,560,000.00) cash in his possession, specially deposited in a Security Bank here.

He advised me not to tell anybody except my mother who is the last wife of the (8) eight wives that he married. My mother did not bear any male child for him. Which implies that all my father’s properties, companies e.t.c., we have no share in them because my mother has no male child according to African Tradition. My father therefore advise to contact his lawyer for the relevant documents of the said money, and told me that I should use this money with my mother and my younger sisters because he knows that tradtionally, if he dies we cannnot get anything, as inheritance.

He importantly advised me that I should seek for foreign assistannce and that I should not invest this money here in Nigeria because of his other wives and male children who happen to be my elders. I am soliciting for your immediate assistance to get a Bungalow for us, where I will live with my mother and two younger sisters and further advise me where and how I will invest the balance money overseas, possibly on products of your company and other profitable ventures.

I believe that by the special grace of God, you will help us move this money out of Nigeria to any country of your choice where we can invest this money judiciously with you. You are entitled to a reasonable part of this money based on our agreement, and God will bless you as you help us.

PLease reply through my e-mail

Looking forward to hear from you as soon as possible.

Regards.

Princess blessing Abonime

മേല്‍പ്പറഞ്ഞ ചിലര്‍ ഇത്തരം കത്തുകള്‍ക്ക് വേണ്ടി കാത്തിരിയ്ക്ക്ന്നവരാണ്. എട്ടുകാലി വല നെയ്ത് അതില്‍ പതിയിരിയ്ക്ക്ന്ന പോലെ ഇന്റര്‍നെറ്റില്‍ e mail തുറന്ന് അവര്‍ കാത്തിരിയ്ക്കുന്നു, തങ്ങളെത്തേടിവരുന്ന സ്പാം മെയിലുകള്‍ക്ക് വേണ്ടി. ചിലര്‍ തമാശയ്ക്ക് ഈ കത്തുകള്‍ക്ക് മറുപടിയയച്ച് അവിടെനിന്ന് കിട്ടുന്ന മറുപടിയും IP address മറ്റും പോലീസിന് കൈമാറീ സായൂജ്യമടയുന്നു. മറ്റു ചിലര്‍ അതിലും കടന്ന കളികളാണ് കളിയ്ക്കുക.

419 scam baiting എന്നാണ് ഇത്തരം കളികളെ സാധാരണ വിളിയ്ക്കുന്നത്. Nigerian criminal code ലെ ആര്‍ട്ടിക്കിള്‍ 419, തട്ടിപ്പ് നടത്തി വസ്തുവകകള്‍ സ്വന്തമാക്കുന്നത് തടയുന്നതാണ്. ഇതു കൊണ്ടാണ് ഇത്തരം തട്ടിപ്പുകള്‍ക്ക് 419 scam എന്ന് പേരുവന്നത്.ഈ തട്ടിപ്പുകാരെ കബളിപ്പിയ്ക്കുകയാണ് ഇവരുടെ തമാശ.

ഈ കളികള്‍ നടത്തുന്നവര്‍ വലിയ തയ്യാറെടുപ്പുകളാണ് നടത്തുക. സ്വന്തമായി ഒരു കള്ളപ്പേര്, അതിനു ചേര്‍ന്ന ജോലി, ഈ മെയില്‍ അഡ്രസ്സ്, വെബ്സൈറ്റ്, ചിത്രങ്ങള്‍,പാസ്‌പോര്‍ട്ട് കോപ്പി, ഡൈവിങ്ങ് ലൈസന്‍സ് എന്നിവ ഉണ്ടാക്കുകയാണ് ആദ്യ പണി. പലപ്പോഴും ഈ ആവശ്യങ്ങല്‍ക്ക് വേണ്ടിത്തന്നെ ഉണ്ടാക്കിയ ഈ മെയില്‍ അഡ്രസ്സുകള്‍ പല കമ്യൂണിറ്റി ഫോറങ്ങളിലോ മറ്റോ രജിസ്റ്റര്‍ ചെയ്ത് സ്പാമര്‍മാര്‍ക്ക് എളുപ്പം കണ്ടുപിടിയ്ക്കാന്‍ കഴിയുന്ന തരത്തില്‍ പ്രദര്‍ശിപ്പിച്ചിട്ടുള്ളതായിരിയ്ക്കും. പിന്നെ കാത്തിരിപ്പാണ്, ഇരയെത്തേടി. അധികം താമസിയാതെ തന്നെ ഏതെങ്കിലും രാജാവിന്റെ മകളോ, അല്ലെങ്കില്‍ ഒരു സൈന്യാധിപന്റെ ഭാര്യയോ ഒക്കെയായി ഇര വന്ന് കുടുക്കില്‍ ചാടും.

സ്ത്രീ പുരുഷഭേദമില്ലാതെ ഒട്ടനവധി നൈജീരിയക്കാര്‍ തട്ടിപ്പുസംഘങ്ങളില്‍ ഉണ്ടായിരിയ്ക്കും.പറയുമ്പോള്‍ നൈജീരിയക്കാരെ മാത്രം പറയരുതല്ലോ. പടിഞ്ഞാറന്‍ ആഫ്രിക്കയിലെ മിക്ക രാജ്യങ്ങളിലും ഇത് തന്നെയാണ് അവസ്ഥ. ചിലപ്പോള്‍ ഗവര്‍മ്മെന്റ് ഉദ്യോഗസ്ഥര്‍ വരെ ഇതിന് കൂട്ട് നില്‍ക്കാറുണ്ടെന്ന് വായിച്ചിട്ടുണ്ട്. പലപ്പോഴും ഒറ്റയ്ക്കായി തുടങ്ങുന്ന തട്ടിപ്പുകള്‍ ഇര വീണെന്ന് മനസ്സിലായാല്‍ പലരും ചേര്‍ന്ന് പല പ്രാവശ്യങ്ങളിലായി കാശുതട്ടിയെടുക്കുകയാണ് രീതി. ഇത്തരം തട്ടിപ്പുകാര്‍ക്ക് വിശ്വാസം വരുന്ന തരത്തിലുള്ള പ്രൊഫൈല്‍ ഉണ്ടാക്കിയെടുക്കലാണ് ആദ്യ പണി.

ഇംഗ്ലണ്ടിലേയോ അമേരിയ്ക്കയിലേയൊ ഏതെങ്കിലും പള്ളിയുടെ പേരില്‍ ഒരു വെബ്സൈറ്റ് ഉണ്ടാക്കി അതിലെ വികാരിയാണ് താനെന്നും നൈജീരിയായിലെ പാവങ്ങളെ സഹായിയ്ക്കാന്‍ താത്പര്യമുണ്ടെന്നും മറുപടി കത്തില്‍ സൂചിപ്പിച്ചിരിയ്ക്കും. ഉടന്‍‌തന്നെ കത്തയച്ച നൈജീരിയന്‍ ഒരു പള്ളീലച്ചനായി രൂപമാറ്റം നടത്തും. പിന്നെ നടക്കുന്നത് മാസങ്ങള്‍ നീണ്ടു നില്‍ക്കുന്ന കത്തിടപാടുകളാണ്. തങ്ങളുടെ പള്ളിയിലേയ്ക്ക വിശ്വാസം മാറിയാല്‍ $10000 മുതല്‍ $20000 വരെ തരാമെന്നും പള്ളി പണിഞ്ഞ് തരാമെന്നും മറ്റും പറഞ്ഞ് കള്ളനെ പ്രലോഭിപ്പിയ്ക്കും. പിന്നെ, അവനെക്കൊണ്ട് കുരങ്ങ് കളിപ്പിയ്ക്കുകയാണ് പ്രധാന പണി. ഇവര്‍ പറയുന്ന വിഢിത്തരങ്ങള്‍ പേപ്പറില്‍ എഴുതി അത് കാണിച്ച് ഫോട്ടോയെടുത്ത് അയയ്ക്കണമെന്നതാണ് ഒരുപാധി. ഇങ്ങിനെ പല പ്രാവശ്യം കിട്ടാന്‍ പോകുന്ന പണം സ്വപ്നം കണ്ട് നൈജീരിയന്‍ കള്ളന്‍ പല വിഢിത്തരങ്ങളും കാണിയ്ക്കും. എങ്ങാനും അവന് / അവള്‍ക്ക് സംശയം തോന്നിയാല്‍ ഉടന്‍‌തന്നെ, പണ്ട് ഈ അമേരിയ്ക്കന്‍ പള്ളിയില്‍ നിന്നും സംഭാവന സ്വീകരിച്ച ഒരുത്തനെ / ഒരുത്തിയെ പരിചയപ്പെടുത്തുന്നു. (അതും ഇവര്‍ തന്നെ, വേറൊരു e mail ID). സ്വന്തം നാട്ടുകാരന്റെ e mail കിട്ടിക്കഴിയുമ്പോള്‍, കള്ളന് വിശ്വാസം കൂടുന്നു. പിന്നെ പറയുന്ന പോലെ ചിത്രങ്ങള്‍ എടുത്ത് അയയ്ക്കുകയായി. അങ്ങിനെ വേണ്ടത്ര ചിത്രങ്ങള്‍ കിട്ടിക്കഴിഞ്ഞാല്‍ അത് 419 scam site കളില്‍ upload ചെയ്യുകയായി. കിടുവയെപ്പിടിയ്ക്ക്ന്ന കടുവകള്‍ക്ക് ഒരു പൊന്തൂവല്‍ കൂടി.

ഇത്തരം കള്ളന്മാരെ കബളിപ്പിച്ച് രസിയ്ക്കുന്നവര്‍ക്ക് വേണ്ട ഉപദേശവും സഹകരണവുമായി പല site കളും നിലവിലുണ്ട്. www.419baiter.com , www.419eater.com എന്നിങ്ങനെയുള്ള സൈറ്റുകളില്‍ നോക്കിയാല്‍ വിശദമായ കഥകള്‍ കാണാന്‍ കഴിയും. ചില കഥകളില്‍ രതിയുടെ അതിപ്രസരവും കാണാം. പല ഫോണ്‍ സംഭാഷണങ്ങളും റെക്കോഡ് ചെയ്ത് ഇവിടെ സൂക്ഷിച്ചിട്ടുണ്ട്. ഒരു തട്ടിപ്പിന് ശ്രമിച്ച ഒരുത്തനെ ഒരു വസ്ത്രക്കമ്പനിയുടെ മാനേജരാണെന്ന് പറഞ്ഞ് പറ്റിച്ച് അടിവസ്ത്രങ്ങളുടെ മോഡലാക്കാമെന്ന് പറഞ്ഞ് അവന്റെ ചിത്രങ്ങള്‍ / അവളുടെയും വാങ്ങിയെടുക്കുന്നതുവരെ പോയി ഈ കടുവകളുടെ കളികള്‍.


ചില നൈജീരിയന്‍ കള്ളന്മാരുടെ തട്ടിപ്പിനിരയായി ലക്ഷങ്ങള്‍ കൊടുത്ത മലയാളികള്‍ കുറച്ചുനാളുകള്‍ക്ക് മുന്‍പ് പത്രങ്ങളില്‍ വാര്‍ത്തയായിരുന്നു. വിദേശികളുടെ അവസ്ഥയും വ്യത്യസ്ഥമല്ല. അമേരിയ്ക്കയിലും ആസ്ത്രേലിയായില്‍നിന്നുമായി കോടികളാണ് ഇപ്പോഴും ഈ ആഫ്രിക്കന്‍ രാജ്യങ്ങളില്‍ വന്നു ചേരുന്നത്. പത്രങ്ങളിലും ഇന്റര്‍നെറ്റിലും ടെലിവിഷനിലുമായി എത്രതവണ വാര്‍ത്തകള്‍ വന്നാലും ഇത്തരം ചതിക്കുഴികളില്‍ വീണുകൊടുക്കാന്‍ ആളുകള്‍ക്ക് ഒരു മടിയുമില്ല. നൈജീരിയായിലെ വിദ്യാഭ്യാസ യോഗ്യതയുള്ള യൂണിവേഴ്സിറ്റി ബിരുദമുള്ള പലരും വരെ ഇത്തരം കള്ളത്തരത്തിന്റെ മുന്‍പന്തിയിലാണെന്ന് മനസ്സിലാക്കിയാല്‍ ഊഹിയ്ക്കാവുന്നതേയുള്ളൂ ഈ തട്ടിപ്പുകളുടെ ജനകീയത.

ഇത്തരം കഥകള്‍ കേള്‍ക്കുമ്പോള്‍ ഒരാശ്വാസമാണ്. ഇത്തരം കള്ളന്മാരെ കളിപ്പിയ്ക്കാനും ആളുകളുണ്ടല്ലോ എന്നോര്‍ത്ത്.കള്ളന്മാരെ എങ്ങിനെയും നിയമത്തിന്റെ മുന്‍പില്‍ കൊണ്ടു വരണം. എങ്കിലും ചില സംശയങ്ങള്‍ ബാക്കി. ഒരു രാജ്യത്തെ മുഴുവന്‍ പേരും കള്ളന്മാരാകാന്‍ വഴിയുണ്ടാകുമോ? ഇന്റര്‍നെറ്റില്‍ കാണുന്ന ഈ ചിത്രങ്ങള്‍ കള്ളന്മാരുടെ തന്നെയാണെന്ന് എങ്ങിനെ ഉറപ്പിയ്ക്കാന്‍ കഴിയും? കള്ളന്മാര്‍ ഒരു ID theft നടത്തിയതാണെങ്കിലോ?

അതൊക്കെ ആലോചിയ്ക്കാന്‍ ആര്‍ക്കാണ് നേരം. നേരമ്പോക്കിന് ആരുടെയെങ്കിലും മേല്‍ കുതിര കയറുന്നത് കാണാന്‍ കാത്തിരിയ്ക്കുന്നവര്‍ക്ക് വേണ്ടത് വാര്‍ത്തകളല്ലേ, എരിവും ചൂടുമുള്ള സൊയമ്പന്‍ വാര്‍ത്തകള്‍. അതു കൊണ്ട് മുകളില്‍ പറഞ്ഞ site കളെ മുഴുവന്‍ വിശ്വസിയ്ക്കുകയൊന്നും വേണ്ട; യഥാര്‍ത്ഥ നീതി നിര്‍വ്വഹണത്തിന് പ്രത്യക്ഷത്തില്‍ സഹായകമാവുന്നവയായിരുന്നില്ല ഈ തമാശകള്‍. ചിലരുടെ ആത്മനിര്‍വൃതിയുടെ ബഹിര്‍സ്ഫുരണങ്ങളായി അവ നില നില്‍ക്കുന്നു. ചില ഗവര്‍മ്മെന്റുകള്‍ പബ്ലിഷ് ചെയ്ത കള്ളന്മാരുടെ e mail വിലാസങ്ങളില്‍ കടുവകളും കിടുവകളും പെട്ടിട്ടുണ്ടെന്നതാണ് രസകരമായ വസ്തുത.

വേറിട്ട ചില ചരിത്രങ്ങളുമുണ്ട്. ആസ്ത്രേലിയന്‍, അമേരിയ്ക്കന്‍ ടീ.വ്വി കള്‍ നടത്തിയ അന്വേഷണ പരമ്പരകള്‍.

താഴെയുള്ള വീഡിയോ 6 ഭാഗങ്ങളുള്ളതാണ്. ചില ടി.വി റിപ്പോര്‍ട്ടര്‍മാര്‍ നടത്തിയ അന്വേഷണവും അതിനൊടുവില്‍ നൈജീരിയന്‍ പോലീസിന്റെ സഹായത്തോടു കൂടി ചിലരെ പിടി കൂടുന്നതും കാണിച്ചിട്ടുണ്ട് ഇതില്‍. ചില ഭാഗങ്ങളില്‍ U.K യില്‍ നടത്തിയ ഒരു sting operation ല്‍ ഈ കള്ളന്മാരുടെ നെറ്റ്‌വര്‍ക്കിലെ ചിലരെ പറഞ്ഞ് പറ്റിച്ച് ഹോട്ടല്‍ മുറിയില്‍ കൊണ്ടുവരുന്നതും ചര്‍ച്ച ചെയ്യുന്നതും കാണിച്ചിരിയ്ക്കുന്നു.


ഏറ്റവും രസകരമായിത്തോന്നിയത് നമ്മുടെ നാട്ടില്‍ തന്നെ ഒട്ടനവധി പേര്‍ക്ക് പറ്റിയ അബദ്ധമാണ്. കറുത്തകടലാസുകള്‍ ഒരു പെട്ടിയിലാക്കി പ്രത്യേക കെമിക്കലുകള്‍ പുരട്ടിയാല്‍ അവ തിരിച്ച് ഡോളറുകളാവുമെന്ന് പറഞ്ഞ് പറ്റിച്ച്, സാമ്പിള്‍ ആയി ഒരു നോട്ട് വെള്ളത്തില്‍ മുക്കി മാറ്റിയെടുക്കുന്നത് കാണിയ്ക്കുന്നുണ്ട് ഒരു വീഡിയോയില്‍. ഇതൊക്കെ കാണട്ടെ ആളുകള്‍ ഇനിയെങ്കിലും പറ്റിയ്ക്കപ്പെടാതിരിയ്ക്കാന്‍.




മനോരമ വാര്‍ത്ത

2010, ഫെബ്രുവരി 20, ശനിയാഴ്‌ച

കാശ് മൊതലായി


ഈ വര്‍ഷത്തെ കഠിനമായ തണുപ്പില്‍ ഭക്ഷണം കിട്ടാതെ പക്ഷികള്‍ വിഷമിയ്ക്കുന്നു എന്ന് കേട്ട് ഒരു bird feeder വാങ്ങിവെയ്ക്കാന്‍ തീരുമാനിച്ചിരുന്നു കുറച്ചുനാള്‍ മുന്‍പ്.പക്ഷികള്‍ക്ക് ഭക്ഷണം നല്‍കുന്നത് ഒരു നല്ല കര്‍മ്മമാണല്ലോ എന്നും കരുതി. നാട്ടിലെ വീട്ടില്‍ പലപ്പോഴും പൂത്താങ്കീരികളും, മൈനകളും, കാക്കകളുമായി ഒരു സംഘത്തെത്തന്നെ അമ്മ കാലത്ത് തീറ്റിപ്പോയിരുന്നു,ഇപ്പോഴുമുണ്ടെന്നുതോന്നുന്നു.അതൊക്കെ ഓര്‍ത്തപ്പൊ വല്ലാത്ത നൊസ്റ്റാള്‍ജിയ.
എന്നാല്‍പ്പിന്നെ ഒരു ചെറിയ Bird feeder വാങ്ങി വെച്ചേയ്ക്കാം എന്നുകരുതി അന്വേഷണം തൂടങ്ങി. വീടിനടുത്തുണ്ടായിരുന്ന ഗാര്‍ഡന്‍ സെന്‍റ്റ് റിസഷന്‍ മൂലം പൂട്ടിപ്പോയിരുന്നു. കുറച്ച് ദൂരെയുള്ള വലിയ ഒരു ഗാര്‍ഡന്‍ സെന്ററില്‍ പോയപ്പോള്‍ പക്ഷികള്‍ക്ക് വേണ്ടി മാത്രം ഒരു സെക്ഷന്‍. ഒരറ്റം മുതല്‍ മറ്റേ അറ്റം വരെ എന്തൊക്കെ സാധനങ്ങള്‍? ടിന്നിലടച്ച മണ്ണിരകള്‍, പല തരം കേക്കുകള്‍, കപ്പലണ്ടി, സൂര്യകാന്തി വിത്തുകള്‍ എന്നിങ്ങനെ...ഹോ. നടക്കുമ്പോള്‍ എന്റെ ഗാര്‍ഡനില്‍ വന്നിരുന്ന് പക്ഷികളെല്ലാം വന്ന് ഒരു ചായയടിച്ച് പോകുന്നതൊക്കെ ഓര്‍ത്ത് അങ്ങിനെ നടന്നു. വില നോക്കിയപ്പോള്‍ ഞെട്ടിപ്പോയി. എല്ലാ ഐറ്റംസും €15-45 വരെയുള്ള റേറ്റ്.
നൊസ്റ്റാള്‍ജിയ - പോക്കറ്റ് -പക്ഷികള്‍ എന്നിങ്ങനെ പലതും തലയില്‍ കിടന്ന് കറങ്ങി. അവസാനം 2 ഫീഡറുകള്‍ (€10 വീതം),പലതരം വിത്തുകള്‍, പിന്നെ ഇതെല്ലാം തൂക്കിയിടാന്‍ ഒരു bird feeder holder (€35) എന്നിങ്ങനെയെല്ലാം കാശുകളഞ്ഞ് ഒരു നെഞ്ചുവേദനയൊടെ വീട്ടിലേയ്ക്ക്. ഇതെല്ലാംകൂടി €20 കിട്ടിയെന്ന് ഭാര്യയുടെയടുത്ത് നുണ പറഞ്ഞ് നോക്കിയെങ്കിലും എന്റെ മുഖത്ത് ഒരു ഇളിഞ്ഞ ചിരിയുണ്ടായിരുന്നത് കൊണ്ട് അവള്‍ കള്ളം പിടിച്ചുകളഞ്ഞു.
മഞ്ഞായകാരണം ഇതെല്ലാം പുറത്ത് ഉറപ്പിയ്ക്കാന്‍ പറ്റിയിരുന്നില്ല, എങ്കിലും ചില പക്ഷികള്‍ വരികയും പണ്ട് താത്കാലികാടിസ്ഥാനത്തില്‍ വച്ചിരുന്ന ഭക്ഷണപാത്രങ്ങള്‍ കാലിയാക്കുകയും ചെയ്തുപോന്നു. പലപ്പോഴും കാക്കകള്‍ തന്നെയായിരുന്നു പ്രതികള്‍. അവകൂട്ടം കൂടിവന്ന് deck മുഴുവന്‍ അപ്പിയിട്ട് നാശമാക്കുകയും ചെയ്തതുകണ്ട് വാങ്ങിയ bird feeder ഉറപ്പിയ്ക്കാന്‍ തീരുമാനിച്ചു. സംഭവം വളരെ ഈസിയായിരുന്നു. 5 മിനുട്ടിനുള്ളില്‍ ഒരു ഭക്ഷണശാല റെഡിയായി. Garden shed ന്റെ വാതിലിനടുത്ത് നിന്ന് 5 മീറ്റര്‍ അകലെയായാണത് സ്ഥാപിച്ചത്. Garden shed ഒരു hide out ആയി ഉപയോഗിയ്ക്കാമെന്ന് ഒരു ദുരുദ്ദേശവുമുണ്ടായിരുന്നു.
ആദ്യത്തെ ദിവസം യാതൊരു സംഭവവികാസങ്ങളുമില്ലാതെ കടന്നുപോയി. ഒരു പക്ഷി പോലും ഒന്ന് തിരിഞ്ഞു നോക്കിയില്ല. രണ്ടാമത്തെയും മൂന്നാമത്തെയും ദിവസങ്ങള്‍ അങ്ങിനെത്തന്നെ കടന്നുപോയി. എന്റെ കാശു വെള്ളത്തിലായല്ലോ ഭഗവാനേ, യിവനൊക്കെ ഒന്ന് വന്ന് നോക്കിയാല്‍ തന്നെ ആശ്വാസമാകുമായിരുന്നു. ഒരു കാക്ക പോലും തിരിഞ്ഞുനോക്കിയില്ല. എന്തായാലും കുറച്ചുദിവസത്തേയ്ക്ക് ഒന്നും ശ്രദ്ധിയ്ക്കാന്‍ പറ്റിയില്ല. അതിനിടയ്ക്ക് €1.50 ന് തൊട്ടടുത്തുള്ള ഒരു കടയില്‍ bird feeder കണ്ടതോടെ ഞാനെന്തോപോയ അണ്ണാന്റെ പോലെയായിപ്പോയി. എന്തായാലും ലാവിഷാക്കിയേക്കാം എന്ന് കരുതി ഒരു നാലെണ്ണം കൂടി അവിടെനിന്ന് വാങ്ങി അതില്‍ ചാര്‍ത്തി.
അങ്ങിനെ പുതിയതൊന്നും സംഭവിയ്ക്കാതെ പല പകലുകള്‍ കടന്നുപോയി. പലപ്പോഴും പല പക്ഷികള്‍ അതുവഴി നടന്നുപോകുന്നുണ്ടെങ്കിലും ആരും ആ ഭാഗത്ത് പോകുന്നില്ല. യെവനൊക്കെ കഞ്ഞി കുടിച്ച് ജീവിയ്ക്കുന്ന വെറും കഞ്ഞികളാണോ എന്ന് ഞാന്‍ അത്മാര്‍ത്ഥമായി ആലോചിച്ചു പോയി. ചില പക്ഷി സ്നേഹികളെ വിളിച്ച് സംസാരിച്ചപ്പോള്‍ ചില ക്ലു കിട്ടി. Bird feeder ല്‍ നിന്ന് കഴിയ്ക്കുന്ന ചില പക്ഷികളേയുള്ളൂ, ബാക്കിയുള്ളവ താഴെ നിന്നാണ് സാധാരണ കൊത്തിപ്പെറുക്കുന്നതെന്ന്. മൊത്തം കാശു പോയി. അങ്ങിനെ അണ്ണാനെപ്പോലെയായിയെന്ന് ഒഫീഷ്യലി സമ്മതിച്ച ശേഷമുള്ള ഒരു പ്രഭാതത്തില്‍, ഒരു കട്ടനടിയ്ക്കാന്‍ രാവിലെ കെറ്റില്‍ ഓണ്‍ ചെയ്ത് പുറത്ത് തണുത്തുകിടക്കുന്ന ഗാര്‍ഡനിലേയ്ക്ക് കണ്ണയച്ച എനിയ്ക്ക് വിശ്വസിയ്ക്കാന്‍ കഴിഞ്ഞില്ല. നാലു പക്ഷികള്‍ പരിസരം മറന്ന് തകര്‍ത്ത് തീറ്റയാണ്. അവ കൊത്തുന്നത് താഴെ വീഴുന്നത് പറക്കിത്തിന്നുന്ന ചില കാക്കകളും. അന്നു കുടിച്ച കട്ടന് ഒരു വല്ലാത്ത സ്വാദ്.
അന്ന് മുതലിന്നുവരെ പക്ഷികള്‍ പല തരം, പല നേരങ്ങളില്‍ എന്റെ ഗാര്‍ഡനില്‍ വന്ന് പോയിക്കൊണ്ടിരിയ്ക്കുന്നു. ഇപ്പോള്‍ അത് കാണുമ്പോഴുള്ള സന്തോഷം ഞാന്‍ കൊടുത്ത കാശിനേക്കാള്‍ വിലയേറിയതാണേന്ന് പറയേണ്ടല്ലോ. അതുമാത്രമല്ല, ഇപ്പോള്‍ garden shed ല്‍ ഒളിച്ചിരുന്ന് ഇവയെ നോക്കിക്കാണുകയും ചിത്രങ്ങളെടുക്കയും ചെയ്യാം. ഇന്ന് വരെ അടുത്തുകാണാത്ത Goldfinch എന്ന ചെറിയ പക്ഷിയാണ് ഇപ്പോഴത്തെ ഗസ്റ്റ്. അങ്ങിനെ പക്ഷി പുരാണം ഇവിടെ അവസാനിയ്ക്കുന്നു, തത്കാലത്തേയ്ക്ക്

2009, ഡിസംബർ 16, ബുധനാഴ്‌ച

നിരൂപകരെ ക്ഷണിയ്ക്കുന്നു

ഇന്ന് വൈകീട്ട് വീട്ടില്‍ വന്നപ്പോള്‍ കണ്ട കാഴ്ച ആനന്ദഭരിതവും ഹൃദയഭേദകവുമായിരുന്നു.

കാഴ്ച താഴെക്കാണുന്നതാണ്.



കഴിഞ്ഞ 2 കൊല്ലമായി വാങ്ങിച്ചുകൊടുത്ത ഒറ്റ കളര്‍പ്പെന്‍സില്‍ പോലും കൈ കൊണ്ട് തൊടാത്തവന്‍ ഇന്ന് പത്തുനിമിഷം കൊണ്ട് തീര്‍ത്ത ചുമര്‍ചിത്രം. ആനന്ദലബ്ദ്ധിക്കിനിയെന്ത് വേണം? ഇടത് വശത്ത് ടി.വിയുടെയും സോഫായുടെയും നടുവില്‍ ഒഴിഞ്ഞ് കിടന്നിരുന്ന ചുമരാണ് തനയന്‍ കലാസൃഷ്ടിയ്ക്ക് വേണ്ടി തിരഞ്ഞെടുത്തത്. അതും permanent ink marker ഉപയോഗിച്ച്.

കലാപരമായി എന്തെങ്കിലും വാസനയുണ്ടെങ്കില്‍ അതൊക്കെ പുറത്തുവരട്ടെ എന്ന് കരുതി ചിത്രം വരയ്ക്കാന്‍ സാമഗ്രികളും പുസ്തകങ്ങളും എല്ലാം വാങ്ങി പുര നിറച്ചപ്പോഴാണ് മനസ്സിലായത്,യെവന് ചെണ്ടപ്പുറത്ത് കോല് വീഴുന്നത് കേട്ടുനില്‍ക്കുന്നതാണിഷ്ടമെന്ന്.

എന്നപ്പിന്നെയങ്ങിനെ എന്ന് കരുതി, ഹാര്‍മോണിക്ക, xylophone, guitar 3 തരം, പിയാനോ രണ്ടുതരം എന്നിങ്ങനെ ഞാന്‍ ജീവിതത്തിലിന്നുവരെ കാണാത്ത, (കേള്‍ക്കാത്തതെന്ന് പറയേണ്ടല്ലോ)തായമ്പകയൊക്കെ വാങ്ങിയപ്പോഴാണ് ഈ സൃഷ്ടി.

ഇനിയിപ്പൊ ഉത്തരവാദിത്വമുള്ള ഒരു പിതാവെന്ന നിലയില്‍ (കരുണാകരനെപ്പോലെ) ഇതിനെ ഒരു അബ്സ്റ്റ്രാക്റ്റ് ചുമരെഴുത്തിനുള്ള വല്ല അവാര്‍ഡും തരപ്പെടുത്തിയെടുക്കാനുള്ള ശ്രമത്തിലാണ് ഞാന്‍. നാളെയിവന്‍ കയറി വല്ല പികാസായൊ മറ്റോ ആയാല്‍ എനിയ്ക്കും പറയാലോ.

ഒരു തുടക്കമെന്ന നിലയില്‍, പണിയൊന്നുമില്ലാത്ത നിരൂപകവര്‍ഗ്ഗങ്ങള്‍ വല്ല നിരൂപണമോ പഠനമോ ഒക്കെ എഴുതിത്തന്നാല്‍ വേണ്ടവിധം കാണുന്നതായിരിയ്ക്കും.

രസമതല്ലാ, ആരാണിത് ചെയ്തതെന്ന് ചോദിച്ചപ്പോള്‍, എല്ലാ തുടക്കക്കാര്‍ക്കുമുണ്ടാകുന്ന ആ സങ്കോചവും വിഷമവും കഴിഞ്ഞശേഷം പ്രസ്ഥാവിച്ചു, "Mommy diiid thiiis!"

അതിന് ശിക്ഷയായി mommy യ്ക്ക് വെളിച്ചത്ത് ചോറ് കൊടുത്ത് ഇരുട്ടത്ത് കിടത്താന്‍ തീര്‍പ്പ് കല്‍പ്പിച്ച് നാട്ടുകൂട്ടം പിരിഞ്ഞു.

2009, ഡിസംബർ 5, ശനിയാഴ്‌ച

‘ശ്രീ’ എന്നെഴുതാന്‍-പെണ്ണുങ്ങള്‍ക്ക്

മിനി ടിച്ചറുടെ മിനി നര്‍മ്മം എന്ന ബ്ലോഗില്‍ കണ്ട നാരായണീയം-ഹരിശ്രീ എന്ന നര്‍മ്മകഥ അവസാനിച്ചത് രസകരമായിട്ടായിരുന്നു.നമ്മള്‍ തുല്യരാണെന്ന് തെളിയിയ്ക്കാന്‍ ശ്രമിച്ച ഭാര്യയെ ‘ഹരി’ എന്ന് മുറ്റത്ത് മൂത്രമൊഴിച്ച ശേഷം അതുപോലെ ‘ശ്രീ’ എന്നെഴുതാന്‍ തന്റെ ഭാര്യയെ വെല്ലുവിളിച്ച് നാരായണന്‍ മാസ്റ്റര്‍ ചമ്മിപ്പിയ്ക്കുന്ന രംഗം.

രസകരമായി അവതരിപ്പിച്ചതിന് അഭിനന്ദനങ്ങള്‍.

ഒരു പക്ഷേ, നാരായണി ടീച്ചറേക്കാള്‍ കടന്നു ചിന്തിച്ച മഹിളാരത്നങ്ങള്‍ ഈ ഭൂമുഖത്ത് ഉണ്ടായിരുന്നു എന്നു വേണം കരുതാന്‍. Dragons Den എന്ന ഒരു BBC TV പരിപാടിയില്‍ കണ്ട ഒരു വസ്തുതയാണ് ഇതെഴുതാന്‍ പ്രേരിപ്പിച്ചത്. പുതിയതും വളരെ സാമ്പത്തികലാഭം ഉണ്ടാക്കുന്നതുമായ ഐഡിയകള്‍ക്ക് സാമ്പത്തിക സഹായം നല്‍കി അതുവഴി അവരുടെ കമ്പനികളില്‍ പങ്കാളികളാവുന്ന മള്‍ട്ടിമില്യണയര്‍മാരെയാണ് dragon എന്ന് ഇവിടെ വിവക്ഷ. അഞ്ചോ ആറോ multi millionaires ന്റെ മുന്‍പില്‍ ഒരു പുതിയ പ്രൊഡക്റ്റ് അവതരിപ്പിയ്ക്കുകയും അതിന്റെ മാര്‍ക്കറ്റിങ്ങ് സാധ്യത അവരെ പറഞ്ഞ് മനസ്സിലാക്കിപ്പിച്ച് അവരുടെ കാശിറപ്പിയ്ക്കുകയാണ് പരിപാടി.

ഈ പരിപാടിയില്‍ പങ്കെടുത്ത ഒരു സ്ത്രീ അവതരിപ്പിച്ച product വളരെയധികം ശ്രദ്ധ പിടിച്ചുപറ്റി. പെണ്ണുങ്ങളെ നിന്ന് മൂത്രമൊഴിയ്ക്കാന്‍ സഹായിയ്ക്കുന്നതാണ് പ്രസ്തുത ഉപകരണം.

ദീര്‍ഘദൂര യാത്രകള്‍, ട്രെക്കിങ്ങ്, വൃത്തികെട്ട പബ്ലിക് ടോയ്ലറ്റുകള്‍ എന്നിങ്ങനെ പല സന്ദര്‍ഭങ്ങളിലും എതിര്‍ലിംഗത്തില്‍‌പെട്ടവരേക്കാളും സ്ത്രീകള്‍ ബുദ്ധിമുട്ടനുഭവിയ്ക്കാറുണ്ട്. മ്യൂസിക് ഫെസ്റ്റിവെലുകളില്‍ പങ്കേടുക്കുന്ന കാഴ്ചക്കാര്‍, സൈനിക സേവനമനുഷ്ടിയ്ക്കുന്ന വനിതകള്‍ എന്നിവര്‍ക്കെല്ലാം ‘നമ്പര്‍ 1‘ ഒരു കടമ്പ തന്നെയാണ്. പലപോഴും പരസ്യമായി കാര്യസാധ്യം നടത്തേണ്ടിവരുമ്പോള്‍ അനുഭവിയ്ക്കേണ്ടി വരുന്ന മാനസികപീഡനത്തില്‍നിന്ന് മോചനം നേടാനും ഇത് സഹായിയ്ക്കും.

ഇതിന്റെ പ്രായോഗികതയെക്കുറിച്ച് ഇന്റര്‍നെറ്റില്‍ തിരഞ്ഞാല്‍ അറിയാം. പല വ്യത്യസ്ഥ അഭിപ്രായങ്ങള്‍ എനിയ്ക്ക് കാണാന്‍ കഴിഞ്ഞു. Re use ചെയ്യാവുന്ന ഒന്നായാണ് ഈ പ്രൊഡക്റ്റ് പുറത്തിറക്കിയിരിയ്ക്കുന്നത്. Disposable ആയ കട്ടിക്കടലാസുകൊണ്ടുള്ള ചില സൂത്രങ്ങളും വിപണിയിലുണ്ടത്രെ.
കൂടുതല്‍ വിവരങ്ങള്‍ക്ക് ഈ വെബുകള്‍ സന്ദര്‍ശിയ്ക്കൂ...
www.shewee.com
http://www.whizbiz.com.au/

പബ്ലിക് റ്റോയ്ലറ്റുകള്‍ കുറവായ നമ്മുടെ നാട്ടില്‍ ഇനി പെണ്ണുങ്ങള്‍ക്കും വഴിവക്കില്‍ നിന്ന് മൂത്രമൊഴിയ്ക്കാമല്ലോ എന്നാണ് ഇത് കണ്ടപ്പോള്‍ ആദ്യം ചിന്തിച്ചത്; ചിരിച്ചുകൊണ്ട്.

പക്ഷെ, നിന്ന് മൂത്രിയ്ക്കുന്ന സ്ത്രീകളെ പകുതി പുരുഷനും പകുതി സ്ത്രീയുമാണോ എന്ന് തെറ്റിദ്ധരിയ്ക്കാനും സാധ്യതയുണ്ട്. ഈ ആസ്ത്രേലിയന്‍ പ്രൊഡക്റ്റ് പുറത്തിറക്കിയത് ഈ പരസ്യം ഉപയോഗിച്ചാണ്.

ഇതുകണ്ട് കിടയ്ക്കയില് ഇരുന്നവന്‍ എഴുന്നേറ്റ് ഓടി വാതിലടയ്ക്കുന്ന ശബ്ദം പശ്ചാത്തലത്തില്‍ കേട്ടല്ലോ അല്ലേ?

എന്തായാലും നല്ലത് തന്നെ! ആരെങ്കിലും ആ നാരായണി ടീച്ചറെ ഒന്ന് കണ്ടുകിട്ടിയാല്‍ ‘ശ്രീ’ എഴുതാന്‍ മാര്‍ഗ്ഗമുണ്ടെന്ന് ഒന്ന് പറയണേ...

വിപ്ലവം ജയിയ്ക്കട്ടെ!